ஸ்ரீ சாயிநாத தவன மஞ்சரி

ஸ்ரீ தாச்கணு  மகராஜ்  படைத்த ஸ்ரீ சாயிநாத தவன மஞ்சரி 

(தமிழில் வெண்பாமாலை by திரு ராமானுஜகள்ள பிரான் (TRK) அவர்கள்)

1. கௌரியின் மைந்தன் கணேசனே போற்றினேன் 
    மௌன மனமெட்டா  மூர்த்திநீ - பௌதிக 
    ஆன்மீக ஆதாரா ! அத்தாட்சி ஆனவனே 
    வான்மேக மாயூரா வா.
                                                                                         
2.   கணங்கள் முதல்வா கணேசா தலைவா 
      இனந்கொள்ளும் சாத்திரங்கள் ஏற்பாய் - மணங்கொள்ளும் 
      பெம்மான் தனிக்கதையைப் பேசிடவே எண்ணமுற்றேன் 
      எம்மான் எனக்கருள்செய் இன்று .

3.   அம்மாஎம் சாரதே! அன்பின் திருவுருவே 
      இம்மைக்குக் காரணியே எம்வாக்கின் - மெய்ம்மைக்குத் 
      தெய்வம்நீ தேவி ஒலிக்கும் பதத்தலைவி 
      உண்மைக் குயிரூட்ட வா .

4.  சொல்லேர் உழவர்க்குச் சோர்வில் அருள்செய்யும் 
     நல்லதோர் நாட்டின் நனிகலமே - எல்லையில் 
     சக்தி யுடையவளே சத்ய சகதம்பா 
     சக்தி !  அருளிடுவாய் சான்று!

5.   பூரணனே மூத்தோர் பிரம்மம் எனப்போற்றும் 
      காரணனே குன்றாம் குணங்கொண்டாய்  - நாரணனே 
      பண்டரீயா!  பாண்டுரங்கா! பாகாய் கருணைபெய் 
      வண்டலவன் வாழ்வுரைக்குங் கால்.

6.   உலகெங்கும் நீநிறைந்தாய் உன்னுருவம் உண்மை 
      பல நூலும் ஆராய்ந்து பார்க்கும் - புலனாகா 
      வண்ணம் எதையும் வசப்படுத்தி ஆட்டிவைப்பாய் 
      அண்ணல் புகழ்பாடல் ஆக்கு.
                                                                         ..
7.   ஏட்டுப் படிப்பால் எவரும் உனைக்காணார்   
      போட்டியாய் வாதம் பிரதிவாதம் - காட்டவொண்ணா 
      சக்ரபாணி சான்றோர்க்கே காட்சியாம் மற்றவர்க்கு 
      வக்ரம் ! வணக்கம் உனக்கு !

8.   ஐந்து முகத்தோனே ! ஐயாவே ! சங்கரரே !
      மைந்து மனிதமண்டை மாலையே - ஏந்தும் 
      கரைகண்டா ! நாமம் கடைத்தேற்றும் : துன்பம்    
      இறைபோற்றும் அன்பருக்கேது ?

9.   உந்தன் கழல்பணிந்து  உன்னுதவி தான்பெற்றே 
      இந்தத் துதியைநான் ஏத்தலுற்றேன் - சிந்தை 
      பசுபதிஓம் ரூபா திகம்பரா தாராய் 
      பசுமையாய் பாபாவின் பா.

10. அத்திரியின் புத்திரர் ஆன்றோராம் தத்தரையும்
       பத்தினியாம் லட்சுமியின் பார்த்தாவாம் - விட்னுவையும் 
      துக்காராம் போலத் தெளிந்த மகான்களையும் 
      பக்தரெல்லாம் போற்றிடுவேன் பார்.

11.  சாயீசா வெற்றி சுகம்பெருக! சார்ந்திட்ட 
       பாவிகளைக் காக்கின்ற பாங்கினிலே - மேவியுந்தன் 
       பாதம் சிரமே பதிக்கின்றேன் பத்திரமாய் 
       பார்த்துப் பயம் நீக்குவாய்.

12.  நீயே பரப்பிரம்மம் ! நீயேதான் நாரணும் 
       நீயே சுகங்களின் நற்பீடம் - நீயே 
       மனிதரில் சீருடையோன் மன்மதனைத் தீய்த்த 
       புனிதஉமை  பாகத்தன் நீ .

13.  மனித உருவெடுத்த மாதேவன் பாபா 
       புனிதத் திருவானத்(து)  ஏகன் - இனித்த 
       கருணைக் கடல்தான் : பிறவிப் பிணிக்கு 
       மருந்தாம் : மகான்களில் வான் .

14.  ஏழைக்குச் சிந்தாமணி, கங்கை பக்தர்க்கே:
       ஊழாம் கடல் ஆழ்வோர்க்(கு) ஓடமாம் - பாழாக்கும்
       அச்சம் தனைநீக்கும் ஆலயமே ! சுத்தத்தின் 
       உச்சம்: உலகுன் களிப்பு .

15.  பிறப்பிறப்பற்றீ  ரெனப் பேராய்வில்  தேர்ந்தோம்
       பிறப்பிறப்பில் பற்றற்றீர்  பெம்மான் - பிறப்பிறப்பு 
       அஞ்ஞானம்  தோற்றுவிக்கும் ஆதலால் மாதவ
       எஞ்ஞானம்  நின்தாள் சரண்.

16.  ஓடைநீர் வந்ததெவண் ? உள்ளதுவே வந்ததாம் 
       ஓடையாம் நீர்வரவால்  ஒர்படுகை - கோடையிலே 
       நீர்வற்றும்  கூடும் நிரம்பிவிடும் யாதானும் 
       பார்படுகை நீர்பார்ப்ப தன்று.

 17. படுகை பெருமையாம் நீர்வரத்தால் வற்ற 
       கெடுகை யுரும்வருந்தும் கீழாம் - இடுகையாம் 
       நீரூற்று சைதன்யம் , நின்றவுடன் நீர்ப்படுகை 
       பூவேற்கும் பூமகனே பேசு.

18. பிறப்பில் அருட்கடலுன் ஆயுதம் எந்தன் 
      பொறுப்பில்லா அஞ்ஞானம் போக்கி - அறுக்க 
      விழைகின்றேன் பெம்மானே வேட்பாமித் தோற்றம் 
      மழையெனமுக் காலமு மாம்.  
                                                                                            ..  தொடரும்
                 .